Gen 33 | NdeIBE | STEP | UJakhobe wathi uvusa amehlo wabona nangu u-Esawu, eqhamuka lamadoda akhe angamakhulu amane; yikho wasesehlukanisa abantwana phakathi kukaLeya, loRakheli lezincekukazi zombili.

Genesis 33

UJakhobe uhlangana lo-Esawu

1 UJakhobe wathi uvusa amehlo wabona nangu u-Esawu, eqhamuka lamadoda akhe angamakhulu amane; yikho wasesehlukanisa abantwana phakathi kukaLeya, loRakheli lezincekukazi zombili.

2 Waqhuba phambili izincekukazi labantwabazo, kwalandela uLeya labantwabakhe, kweza uRakheli loJosefa ngemuva. 3 Yena ngokwakhe wahamba phambili wakhothama phansi emhlabathini kakhombisa esebanga kumnewabo.

4 Kodwa u-Esawu wagijima wahlangabeza uJakhobe wamgona; wamgola ngezingalo entanyeni wamanga. Bakhala. 5 U-Esawu wasekhangela wabona abesifazane labantwana. Wabuza wathi, “Ngobani laba ohamba labo na?” UJakhobe waphendula wathi, “Ngabantwana uNkulunkulu abaphe ngesihle inceku yakho.”

6 Kwathi izincekukazi labantwabazo, zasondela zakhothamela phansi. 7 Kwalandela uLeya kanye labantwabakhe beza bakhothamela phansi. Abokucina kwaba nguJosefa loRakheli, labo bakhothamela phansi.

8 U-Esawu wabuza wathi, “Utshoni ngemihlambi yonke le engihlangane layo?” Wathi, “Ngeyokucela umusa kuwe, nkosi yami.”

9 Kodwa u-Esawu wathi, “Lami sengilakho okunengi, mnawami. Zigcinele lawe lokho olakho.”

10 UJakhobe wathi, “Hatshi bo, bakithi. Uma ngisamukeleka kuwe yamukela isipho sami lesi. Ngoba ukubona ubuso bakho kufana lokubona ubuso bukaNkulunkulu, ikakhulu njengoba usungamukele ngesihle. 11 Ngicela ukuthi wamukele isipho leso esilethwe kuwe, ngokuba uNkulunkulu ube lomusa kimi, ngaba lakho konke engikuswelayo.” Kwathi ngoba uJakhobe ebelesela, u-Esawu wasamukela.

12 U-Esawu wasesithi, “Kasihambeni. Ngizahamba lani.”

13 Kodwa uJakhobe wathi kuye, “Inkosi yami iyazi ukuthi abantwana babuthakathaka lokuthi ngisamele nginakekele izimvukazi lamankomokazi konke okusanda kuzala. Zingahanjiswa ngamandla okwelanga elilodwa nje, izifuyo zizakufa.

14 Ngakho inkosi yami kayizihambele phambili kwenceku yayo, mina ngilandele kancane okwamandla emihlambi eqhutshwayo labantwana, ngize ngifike enkosini yami eSeyiri.

15 U-Esawu wathi, “Nxa kunjalo ngizatshiya amanye amadoda ami lawe.” UJakhobe wabuza wathi, “Kambe ube ukwenzelani lokho? Inkosi yami kayingenzele umusa nje kube kuphela.”

16 Yikho ngalolosuku u-Esawu wasuka esebuyela eSeyiri. 17 Kodwa uJakhobe waya eSukothi lapho azakhela khona umuzi wakha lezibaya zezifuyo zakhe. Kungakho leyondawo ithiwa yiSukothi.

18 UJakhobe esebuyile ePhadani Aramu wafika kuhle edolobheni laseShekemu eKhenani wamisa izihonqo idolobho selibonakala. 19 Ngezinhlamvu zesiliva ezilikhulu wathenga isiqinti somhlabathi emadodaneni kaHamori, uyise kaShekemu, lapho amisa khona ithente lakhe. 20 Khonapho amisa i-alithare walibiza ngokuthi yi-Eli Elohe Israyeli.